Suterotafa klepa ke Nagib Maxfuz do izva ke witaf berpot koe Misra is arabaxo manton gojewer. Teni XIX^-eafa decemda, va selt is araya kosmasa va bato suterotxo kan kalarabavara va decemdaf europaf berpot se arabavaf berpot toz koar. Bak 1920 sanda, Muxammad Xusayn Xaykal suterotik is gaderopik waster va nasbara va vedeyaf suteroteem kan europafa teza yo ta da misrikeem koeon wir da tir lodabduef dam Talteka, ise rotir da tir lokaikef dam in koe seltayind. Metel lokiewon dam Nagib Maxfuz va man abdumimaks artstatar.

Bak 1911 koe glastedafa yasa ke Alkaira Nagib Maxfuz koblir. Koe Alkaira kotla (Fuad kotla) vayar ise bak 1930 sanda koe suterotafa virda se va taneaf suteravord yo sanegar. Aze va flibikaf play seotar ise gorar da ta berpotafa tolsutera va izva ke Misra va int di ektur. Rodjam ke taneaf berpot se, dilizes koe faraonafa Misra, is rotir orkakwitilu (yoke toza ke Toleafa Tamavageja Misra jebeper) joke negara va davafa izva gan in va man abdumimaks askebkad. Daletoe, koe milsarefa Alkaira inaf berpot sokid. Va inaf seltaf ropplekuwereem geltriluevon pimtar ("Zukak al-midak", 1947 ; "Bidaya wa-nixaya", 1949).

Vexe sanefa kiewatca is malhoparafu kagrupenilu gaveped. Bak 1952, kaiki da tenuyur va berpotap vanpitis Bara ("Bayn al-Kasrayn", "Kasr al-Cauk", "Al-sukkariya"), joke nios (ledolukafa vols lododesa sutera) va berpotafa sutera Maxfuz malisker. Sanegara va Bara bak 1956-1957 va in basetrakar. Tison 45^-daf in adim zo kagruper. Kan bat yasaf bwoy dere tis izvalenopara va Misra, mali 1919 artowara kali ironokaf tandeem ke gazaroti, Maxfuz tir nesidaf gu tela warzafa gaderopafa debala male vertumabetara ba 1952 is gu suterotaf is yanbaf lizor gogolas va kottazukafa geltrilueva.

Soe kan "Aulad Xaratina" intaf azaf berpot (1959) in ilon ilawé; tir viank koe klepa is izva ke arabavaf berpot. Va kulafa prostewa ke purdasorda in keskeon tolwebokar ta da voner va malhopara va ginukaf dantereem ke vertuma ke Nassir, ise kaikon voner va rotatrakurevafa undera va roti. Koe Al_Axram fela skulton sanegayanon, gan ulemik se karolas da in tir lamtas tel berpot zo dilfur aze koe Misra zo levpour (bak 1967 koe Beirut zo sanegatar). Milsareon va inafu sposilu bilita weber ise va flibaklepa me vanolar. In sanegapar : va warzot se koe feleem is mon tanoy tandaf berpot, lopokon dimpison va malhoparafa geltrilueva ("Tartara fauk al-Nil" bak 1966, "Miramar" bak 1967), oke palseson va intafa staksa koe tselkkselt yo ("Al-lis wal-kilab" bak 1961, "Al-tarik" bak 1965). Nelkaf geltriluevaf berpot se tantaton elpatopon zo zaled, acum va logijaf saneg dam tel suterotaf en vansar.

In tir pokeas va jotaf zidaf suterotik se tidas remi lembiekafa rekola moi 1967 egale, aze koe radimif berpot se va sinaf listiluf tuwarzaks yo balte miv nareter. Vexe tir viele do intafa gelukafa koswasa klita (guazafa Alkaira ke rumeilu) in tolwebokar da tide yanba en tir ("Xikayat xarati-ba" bak 1975, "Malxamat al-Xarafic" bak 1977).

Zavzason lisagaf gu nuyiluevaf gaderopaf minieem is intafa envara va suterot, bak 1980 sanda in tir feliik tarkan tuke lidadugeem is vanburepera pu arabavaf berpot, vexe golde gaderopaf ikatcuks yo (tulon zobera va misrayisraelafi dili) fereon zo akler. Ba 1988 pu in Nobel Poradro zo ziluker. In tir tel taneaf arabavaf suterotik baton gableyen, acum va tamavadolebela di vansar (konaka decema dem remsuteks kal konaka sanda dem ava batvielon zo ropatad). Vexe, koe orka ke tizafa likera wale roti is lugavevaca yo ke islamevaf kevusikeem, is dere koe lidafa is alkafa tutritawera riwe icdesa va kota bada se ke misraf selt, motc icde "Aulad Xaratina" zo toltitar. Golde wedasa pisonarayovara gan toloy islamevaf jotaf ukik (1994) Nagib Maxfuz galovon moblir.