KOTAVA
Kotava rundawer kene enundepera va olegara va arafa tamefa golerava novesa, keve tuwavaveem, pu kot ayik ke minafa winta da in sinton drikon rogoler.
Staren Fetcey, tel redusik, va nelkaf nhapes ovakeem stayas art redura va Kotava wonar.

PULVIROPA IS MAMOPA
Kotava digir va mamopaf is pulviraf bolk belcon opelapaf is nustapaf.

Abava doplekur va 25 eltay, kot vadjes va tanoy solwif mamolk. 5 kirn is 17 rol is 3 kirnrol.

Kotava zo sotiyar dum zo suter ise meka divzawara.

Luxe pulviraf bolk in tir drekirapaf is ovarotapaf, grustayan moe tel abic kotlizef tamef nelkot. Batdume gan bettan zo roraver.

STAAVEEM
Kare belcon tamef is popaf is rotowas tison opelaf is drikon roradan is rofosan nustaf envakseem kotrafa Kotava al zo gestar.
Abic nelkotap va in dred ise askid da kulanhafa is plaxanhafa xeka tir.

NASBARA
Maletiks va vayarafa is kobarafa is tolbunturafa jontika tanda Kotava tir.
Mali winugafa redura bak 1978, konaka rigotafa towara al sokid.

SUTEROTEEM
Tamavaf suteroteem tir cugunaykafa kiewega, itaya dem narmaf grabom se vrutas va ayafa norluca is sinafa suterava. Tan bitonaf mukot ke bato xo tir da va kotarayaf sin loote atoer.
Vleveon, tid vexala dem suterotikanh ke dan grabomkalkotavaks krulded. Kotavafa tanizva ke kot suterotik dere kotviele tir.
Suterotafa kotavaxa dere zo atoed.

KALKOTAVAKS SE
Jontik kalkotavaks krulded. Yon pulotaf krent is yon amidaf malnariks ikz-. Vleveon, konak kalkotavaks geltrayan gan Staren Fetcey is yon amidaf tozaf kotavusik.
Dere rin, me klabul ise drageson va intaf yon kalkotavaks webel acum va cugunaykaf rotegisaceem ke Kotava batinde danedil.

TELIZ YO
Vleveon jontiki gluyasiki jupasi kal yon teliz icde Kotava. Keve winugaf pulviropak, jontik amidaf uum isu watsaca al mukotad va yon pintakiraf pebuks is yon sebuks gan miv Staren Fetcey ik bewik ke Kotavaneda.
Amidafi dulapafi webesiki dere zo atoed.
Adim, konak felateliz.

KOTAVA --> FRANCAVA RAVLEMEEM

Lo 17000 zaeya va kotavaf ravlemeem batvielon ponad. Ota verton tulogijawer kapbure warzaf ayatrakuraf muxasaceem is minaf seltolegareem.

Male bat zaeyeem ronasbat va konak vuntoy nhan ravlem (okon tamefa dantenaca, tuke indaf osteem) ik ponan trogarn (kare verteem ta ponara ik joara).

Va yona xantafa (okon taneodafa) zaeya kotavaf ravlemeem abavon atoer. Kota taneodafa zaeya (kramtukaludevkirafa) va tanoya rapa oku kuparki tadler. Zaeya sudon awir.

Tel loyavaf indaf nhan ravlem (blafotaludevkiraf) bifoton radimeon ferenon awid. Aze vleveon, ede tid, toleodafa zaeya (okon titickafa dantenaca, ritaludevkirafa), miv ronhasa va intafa yona indafa dantenaca.

Grayafa zaeya zo vuesteyed bene intaf taneaf amulaf ilkom (zawe yon meilkomaf gray bene bareaf).

FRANCAVA --> KOTAVA RAVLEMAK

Koe ravlemak mon 20000 francavaf ravlem isu muxaks is intaf kalkotavaks noelon bonjawed. Ota verton tulogijawer kapbure warzaf ayatrakuraf muxasaceem is minaf seltolegareem.

Va francavafa giltafa abavuca ravlemak tarkar. Kot ravlem tir tanoy vexalolk koe dan gedraf sugdalaf ik muxas maletiks rotid, kot bat digis va tanoy amidaf kalkotavaks. Bat vleveon ferenon bam awid. Kot taneodaf vexalolk tir kramtukaludevkiraf volse toleodaf maletiks tid blafotaludevkiraf.

GLUYASIKI SE
Vleveon jontiki gluyasiki jupasi kal yono kotavafo ok kotavuso internetxo, kotlize koe tame.
Rin dere trasitil va yoni jupasiki kal yono xadolafo ik avopafo internetxo lize bibera icde Kotava is walvedeyaf goleraveem en zo ruenhed.
Adim, yoni gluyasiki jupasi kal yono amidafo dulapafo divefo internetxo.
Me klabul da pu cin sugdalal ede beti vlevefi gluyasiki kal rolafe ok voltise mane co-jupar.

RAVERA
Vleveon va kaliafa raveranuva va kotavaf omaveem di trasil, ton 20 azazon gokosmana abduasa ravera.

Va 4 pak bata ravera tantar :
- Yona verta : pintara va yona pulviropafa verta ruena koe watsa
- Yona ksubera : konaka ksubera kapbure raverawatsa
- Yon ravlem : yon ravlem isu trogarn ruen koe ksubera
- Yona dulzera : vixara va ksuberadulzereem.

PRILARAK
Vleveon tid konak giltaprilarakam, watson is flidekson grustanaf.
Va lodabdufa avaravera bat prilarak denon me ikad voxe noved da va jontik omavaf ravlem isu blayak isu debala kalion giltavel.
Kot prilarak tir baravaf : Kotava is Francava is ara ava.