Dene Internet konako xo ektudaso va Kotava tigid ise va rob pu kottan dulapes ik djuraveckes dafud : tire winugafo xo vox dere konakaro. Va jontik valdig abdaraykayan isu ravlemak isu kotavaxa dene yono jadifo xo dere trasit. Batcoba tir kiewaca ise, loon rodadin is walzilin rob titid, pune loon ota ke korik rojekun gan bata cuisafa erava di laumatar.

Icde vugon avopafa kerdela is ravlemaf rob, konako abdumimaso xo darekeon al krulded. Va Tamava.org tulon ozwat. Azon va lana aptijuyusa yovara, i va yoltkirafa gu Kotapedia.org.

Bato xo xialayad da va walzilina darka di firviyid lize kottan co roweber ise va orig ik vuestexa ik ozwaks ik divokseks co rotukular, i va ra yunkesa va Kotava is kramafa favera va ina, i va blis ravlemak ke blisa is divlizesa ava. Goxe bata taneafa bagala al aptijud, lokon golde yona brubefa nararaja ( walaxa envajayana is guivensena luxe Tamava.org, is gojafo xo drikafo gu malbetara ) ik zvak ke zanisiko is emudesik ( luxe Kotapedia.org ) jupayas va waljoara va zanira.

Mef daneks ke batyona yovara tiyir da mali konaka tanda, vaxe xo loon suterotafo dum tulon Wikikrenteem is Kotavaxak dem Suterot, kono xo ektudaso va kotavaf ravlemuum is tiso pakeno is rovansano is rotukulano gan kottan mea tigiyir. Mana gracara tiyir bluvafa num dace loloon vetuigas va vonewera ke ava is anamefa doda.

Batdume, arti noafa undera va vefakieem is olegareem is brubef kerdeleem is gotixan baltanikeem is rotamuzen cek is gokaikfin gedraf is amidaf stegeeem, Kotava Avaneda va koaskira va warzafo xo titiso ravlemafa xadola va Kotava al gorar, nume pokolet da ina keve Kotava.org winugaxo vanpitir blisa vuestexa va ravlemaf batak ke Kotava. Maninde batcoba vodayar da va waljoayan Kotapedia.org abdumimaks di dakiyir, vox lopon bitonon is moe amidamafa omava. Numon laninde drigdatason va bata lintera, Kotapedia trogarn wetce Kotapedia Avaxadola al zo djusaver. Batinde avaxadolafa godela namon zo divnedir.

Kotapedia Avaxadola do bata xialara kle koblir. Vanmiae rigotaf kredeem ke vebarak adraca tiyir inde xo di gotir walpakeno liz kottan va intyona webera is tukulara va dof grupekseem kare stinuca is kuranira rovanbureter, ise bata kotcoba ta towas is walpaken siak.

Kotava Avaneda batvielu va Webmistusik manon djugrewar, gu kotafa kobara ta envara is gluyonara va rodadin origakeem is brubefa koinkera, voxe arbeon meka batcoba co rotiyir kasafa. Lana kobarapa dem sopus is rowin daneks entis seramanyaf.

Oye mana bokasa omava, ede batvielu bato xo ixam katcalafo gan cug kotavusik iku webesik me co di zo vanpilkar, pune batcoba co titir koncoba gobatcepena. Acum volant kot vaon lasusinkat ise yunket ise blisit !! Staren Fetcey bak 1978 va Kotava al redur. Batvielu dodama aname zultafa is seramafa rieta va ava djutisa tamefa nek tarkasa va arayafa mialoducacka al vonewer. To minafa lotira tir da, dafuson va loa xeka isu vuestesa omava mu cugtan ke koti tawavaki, va bat nelkoteem loon ontinon gin buretet.

Kotapedia djupotir vuestesa avaxadola va Kotava. Batenide, icde kot teliz, va tentura is kalavara gu cuga tuwavava is ozwara va sutesik is rabatena usa towara is tula is klituum ikz- gokalobrat ise dun gosugat. Ison va kon zvak ke zanisiko ik dikis va divef emudesik mea gokivat larde belca dene volveyind pofecken gan doda zo emuder.

Kle, batvielu, va Kotapedia blisit !! Batkane ina vanpir vuesteso xo kagrupeno is djumano is koswaso va cugaro. Min mo intaf uzadjoak !!